Thursday, December 17, 2009

99-میوز

;;;;;

بہت سرمئی دھند تھی ۔۔۔ آسماں سے زمیں تک
مرا نرم دل نو دمیدہ تھا
نوزائیدہ تن تھا ۔۔ شیشے کے مانند نازک
ابھی تک بہت خواب دیدہ تھا
اور چشم حیراں ذرا نیم وا تھی
مری نیم وا چشم حیراں نے ۔۔۔ مشرق کی جانب
افق میں سیہ اور شفاف آئینے پر
اپنے طالع کو بیدار ہوتے ہوئے
پہلی ساعت میں دیکھا
وہ ساعت کہ جس کے اجالے کے نیچے
مری زندگی نے، کنار عدم سے ادھر پاؤں رکھا
مرے جسم نے باغ دنیا میں بہتی ملائم ہوا کا
ذرا نیم شیریں
ذرا نیم سرداب چکھا
مرا نرم دل جو ابھی نو دمیدہ تھا
اس آئنے میں خود اپنا وجود خفی دیکھتا تھا
تو اس ائنے میں جھلکتے ہوئے اس نے دیکھا
مرے ساتھ ۔۔۔۔ اک اور چہرہ

ازل سے ابد کی طرف جاتے حیران رستوں پہ
قرنوں تلک نور ہی نور تھا
رستہء سیم تن کے کناروں پہ رنگیں گلابوں کے تختے مہکتے تھے
خوشبو کی بارش فضائے جہاں پر اترتی تھی
حد سماعت سے آگے تلک نقرئی گھنٹیوں کی صدا تھی
مری جاں، شب و روز کے فہم سے ماورا تھی


کوئی چاندنی سا لبادہ پہن کر
میں اپنے بدن کی لطافت میں
جب آسماں سے زمیں کی طرف اٹھ رہی تھی
مرا ہاتھ تھامے ۔۔۔ مرے ساتھ تھے تم



سنہری بدن پر ۔۔۔
مرا تن سنبھالے
گلابی لبوں پر ۔۔۔
مرا لمس اٹھائے
ملائم نظر میں محبت کی
رنگین دنیا سجائے








تمہاری چمک دار زلفوں سے
کتنے زمانوں کی تازہ ہوائیں گزرتی تھیں
آنکھوں کی اس نیلمیں تاب میں
سینکڑوں شنگرفی سر زمینیں ۔۔۔ کئی نیلگوں آسماں تھے
زمیں سے فلک تک ۔۔۔ ہزاروں نظارے نمایاں تھے
لیکن مری چشم حیراں میں ۔۔۔ یہ سب تماشا نہیں تھا
فقط تم عیاں تھے
رگ جاں میں بہتے ہوئے سرخ خوں میں رواں تھے

مری روح کے سبز شعلے میں
اونچی ۔۔۔ بہت اونچی اٹھتی ہوئی ایک لو تھی تمہاری
مرے سر کے اطراف میں جس سے نورانی ہالہ بنا تھا
کہ تم اولیں خواب ہستی کی صورت
خدائے محبت کے مانند
دل میں نہاں تھے

---------------------
Muse---شاعرانہ الہام

;;;;;

2 comments:

Farid Gul Momand said...

I may not be the best person to make an appropriate comment, but I love reading your poems. I can relate it to myself too. I guess this is a sign of all great writers tht you find yourself in their writings. It is not only romantic poems tht you write so well, nut non romantic as well where you are always full of advice that is helpful and informative where people can disgest it in their souls to become better human beings.Your poetry is therarpy to people who wants to express something but cant.You have a beautiful soul and its always a pleasure reading your poems.

Farid

hayat said...

Thaks.